湯顯明出席立法會之黄湯對話

話說湯顯明同意5月18日出席立法會，咁都制，預咗畀人插，有乜計呢？佢咁鐘意飲黄湯，標少成全佢，諗咗段黄、湯對話出嚟畀佢參考吓。

黃：湯總，今日手風咁差，打極都唔入窿。

湯：標哥，手都震哂點打得入吖！

黃：去立法會驚到震呀？

湯：梗係唔會啦。我同你打吓波飲吓酒，唱吓歌放吓狗，又無租你地方住。曾總租你地方住畀人叫曾大屋，畀着我最多畀人叫湯房，怕乜吖。人地話我住湯房，肯定係廉潔啦。

黃：咁講你又飲到手震呀。

湯：之唔係。啲茅臺XO梗係快啲飲哂佢啦，唔通好似曾總咁攞去賣咩？我無佢咁貪錢。飲哂就無贓無證，奈我唔何，話我無上繳，我都飲哂啦，好似碼頭外判商永豐嗰條茂里咁講，吹呀。

黃：咁你去到立法會打算點講呀？

湯：好似人肉錄音機咁囉，我哋做AO最拿手架啦。

黃：不如話腳痛去唔到吖？

湯：腳痛頂得一陣，下次又用乜理由呀？

黃：你飲到黐肺，不如話肺癌啦？

湯：標哥你有無醫學常識架？飲嘢唔會入肺架。

黃：咁不如話肝癌？

湯：咁就似樣啲。不過肝癌都講得嘢架，始終都答到問題。

黃：不如話口腔癌、食道癌，咁嘛講唔到囉。

湯：都唔錯。佢哋叫我寫出嚟咁又點呀？

黃：咁你嘛拉布囉，佢哋都慣哂架啦。你寫慢啲，又唔識寫，又寫錯字，又重頭寫過，又要去廁所，又要食藥，又要瞓晏覺，又要飲番杯，又要食飯，又...

湯：又要唱K添。夠啦夠啦，加埋律師叫我唔好講咁多，一於咁話。



昨日竟然有936個點擊，標少越嚟越紅啦。