公仔佬愛國

金髮紋身青年拉橫額示威
「朋友叫我嚟」

【明報專訊】「佔領中環」發起的民間全民投票昨日開設21個票站，方便市民投票，其中最少4個票站出現反對者示威抗議，示威者中有長者、有青年，其中在香港仔聖伯多祿堂票站外，昨午出現了數名戴口罩的染髮紋身青年，警方一度到場了解，未有拘捕任何人，示威者站立數小時後即離去。

各票站昨晨10時開始運作，港大票站外一早就出現約20名示威者，部分人染金色頭髮及紋身；而昨日才開設的香港仔聖伯多祿堂票站外，昨午1時45分亦有同類示威者。記者約2時現場所見，示威者全戴口罩，部分染金髮，一人頸部有「鬼」字紋身，他們手持「反對非法公投 要求理性普選」標語站在票站外斜路底，未有叫囂。

數名示威者一度站在通往票站的唯一樓梯抽煙，令行人難以通過，直至職員守住樓梯口，示威者才移步到附近的行人路，繼續舉起標語默站。其中一名示威者阿樂稱，是次行動為自發，當被問及反對「公投」的原因時，他說「其實我都唔清楚，係朋友叫我嚟」，亦表示沒有收取酬勞。

另外，在新設的牛棚及中大票站外亦出現手持「包容體諒 求同存異」、「飲水思源」等標語的示威者，其中「異」字用簡體字書寫，部分示威者不時零星地叫「愛國愛港無罪」口號，亦有示威者為長者，皆逗留數小時後即離去。

(30/6/2014)

都話黑社會都愛國、愛港、愛埋共產黨架啦，你睇金毛公仔佬(紋身漢)有傳染病帶晒口罩都去票站玩嘢。天時咁熱，帶口罩唞氣都好辛苦喎，真偉大，為免傳染啲愛國病畀香港同胞，防禦功夫做到足。話時話點解唔紋五星旗或者洋紫荊公仔，而既人唔似人，鬼唔似鬼咁紋個鬼字呢？唔紋洋紫荊都有理由，個洋字就擺明就外來勢力喇，特區嗰枝旗好明顯就係內奸搞出嚟架啦，唔係點會用洋人既花啫？不過公仔佬好紋唔紋點會紋個鬼字架，擺明係外在勢力啫，佢大佬點會派個假洋鬼子嚟架，要晒馬都揾啲紋咗青龍白虎、刀刀槍槍嗰啲喇，咁先至震懾到啲選民吖嗎。

我仲記得元朗嗰鑊，梁振英落區，公仔佬提供保護，標少當時話要踢佢竇，掃佢場，好彩差人真係有犂庭掃穴，我條氣都順啲(就係呢篇：黑社會挺梁事件)，幾時搞到黑社會可以干政？金毛公仔佬帶口罩企喺票站門口，唔係靠嚇喺度做乜？應該揾DATS去，懷疑佢藏有攻擊性武器、藏毒，非法入境，拉佢返去搜身，邊個會話你濫權吖？乜叫DATS? District Anti Triad Squad，即係反黑囉。

喂黑社會都做好事喎，王雀行動咪救咗啲民運人士囉！我都唔鐘意，呢個世界無免費午餐，只有交換條件，欠人情要還架。你咪以為我亂嗡廿四，當年岑建勳同馮志活喺新蒲崗第一庭擔保個販毒，點解吖？就係還人情債囉，後來條友棄保潛逃去咗泰國，客死他鄉。黑社會揾食而犯法，拉佢告佢，黑社會干政，唔犯法都要打沉佢。你問吓佢哋乜叫「反對非法公投 要求理性普選」。阿公佢就識，佢大佬個大佬囉，公投係乜佢點知，「性」佢梗識，其他嘢就乜都唔識。