畢屈的白皮豬

「老公，快啲改機票走喇，白皮豬都出埋，死咯，以前出啲紅皮豬就搞咗個無文化嘅大革命出嚟，依家出咗白皮豬，咪要搞白色恐怖？」畢太活了幾十年，這次講了一生人最有見地的話。

「老婆，唔怕掛，改機票要畀錢個喎。紅皮豬始終係燒過，唔夠健康喎，白皮好啲，香口果啲無益。以前有剩餘權力，咪好似食剩餸尾，依家好喎，食新鮮個喎。」老畢循著老婆豬的啟示來發揮。

「新鮮有鬼用咩，中央話哂事，你吃乜都無得揀，你食西餐就話你勾結外國勢力，第二時要食番白粥油炸鬼，唔好食麥當奴喇。中央畀乜你食你就食乜囉。唉！今次實行要食mud囉。」

「老公，香港以後會太平啲囉，依家話連法官都要做愛……」

「吓，法官家庭生活都管埋，有無規定幾常造吖？」

「老公，你講乜呀？嗰篇嘢話法官都要做愛國者，造乜愛啫？」

「即係乜解？司法誓言咁講咋喎：

司法誓言

我謹此宣誓：本人就任中華人民共和國香港特別行政區法院法官/司法人員，定當擁護《中華人民共和國香港特別行政區基本法》，效忠中華人民共和國香港特別行政區，盡忠職守，奉公守法，公正廉潔，以無懼、無偏、無私、無欺之精神，維護法制，主持正義，為香港特別行政區服務。

效忠，唔係愛國喎。」

「老公，效忠英文係乜？」

「老婆，bear allegiance囉。即係忠心，無二心囉。即係好似容醫生咁，佢唔愛佢老婆，但佢無包二奶喎。而且，講咗四個無字，都無講無產階級。何來愛國愛黨？」

「老公，咁第二時法官審果啲講打倒共產黨嘅案，咪可以判佢叛國，判佢入秦城。咁使唔使向中央請示一下先？」

「老婆咁又唔使，釘硬喇，邊使請示啫？至多問吓中央點判就得喇。打個電話問吓囉？」

「乜唔係中聯辦打畀法官指導佢點判咩？」

「老婆，尋日梁振英見記者，大汗叠細汗，唔夠冷氣咩？而且做乜要譯成七國語言呢？」

「佢標哂冷汗吖嘛，七國語言係隱喻嚟呀，即係暗示香港七國咁亂囉！」

畢氏夫婦，在畢夫人英明領導下，當機立斷，付諸行動，當晚立即離開香港。在飛機上，老畢念念有詞，不斷重複：God bless you.