拉長毛

為拉布揚言缺席審訊 長毛﹕拉我囉

【明報專訊】立法會預算案拉布出現變數，牽頭的立法會議員「長毛」梁國雄或不能出席會議。梁國雄及「阿牛」曾健成等人，涉於2012年10月出席民間電台等網台在政總舉行的義播行動，被控無牌廣播等罪，案件定於下周一開審，料審10日，惟長毛以需出席財政預算案辯論「拉布」為由，昨向法庭申請押後審訊遭拒。梁事後稱﹕「打算唔嚟㗎啦，拉我囉，無所謂。」

涉無牌廣播 料審10日

眾被告包括梁國雄、曾健成、潘達強、曾浚瑛、張錦雄及海昇科技有限公司，被控共26張傳票，指他們於前年10月22日至11月1日，在政府總部平台對出無牌設置電訊設備，以及藉未領牌的電訊設施發送信息。

昨沒律師代表的梁國雄說，下周必須出席立法會財政預算案會議，預計今年10月初才會辯論完畢，故申請將案押後至10月中審理。其他被告均無異議，控方則持中立態度。

官：押後審訊浪費資源

惟主任裁判官錢禮指出，本案早於一年前首次提堂，今年1月已定下審期，更兩度進行審前覆核，但梁均沒提出押後申請；加上審期長達10天，牽涉24名控方證人中有20名均與梁有關，質疑若押後審訊將浪費法庭資源，亦對其他人不公，故拒絕申請。「長毛」事後揚言不打算出席審訊，然而裁判官在庭上已明言梁身為被告之一，不能缺席審訊。

另外，立法會昨繼續審議財政預算案，主席曾鈺成開始與各黨派會面討論如何處理，今日將與建制派會面。人民力量陳偉業昨與曾鈺成會面後指出，如不再流會，預料本月底可完成辯論，呼籲曾鈺成不要輕言剪布。政府今日將開緊急會議討論應變方案。

陳偉業：料月底辯論完財案

有建制派直言，既然陳偉業已表明月底可完成，相信曾鈺成日後或會以此為其中一個理據終止辯論。政界估計曾鈺成有機會在5月底「剪布」。公民黨梁家傑說，與曾鈺成會面時，對方表示若審議能在政府出現財政困難前完成，便毋須剪布。民建聯葉國謙認為若不剪布，立法會難在本月批出預算案撥款，但大部分建制派都不想再加開會議，因其他會期已經非常緊密。

（15.5.2014）

話時話，長毛啲law都幾醒，睇嚟好過馬恩國大律師。點解咁講？就係上面呢一篇。佢話我拉布唔上庭，你拉我囉。下星期一長毛真喺唔上庭，點搞？主控梗係申請拘捕令喇。即係點？主控申請拘捕令，大人立即批准，無得充供保釋金，因為傳票上庭無經過差人拘捕，一般都唔會有擔保金。咁拉到佢畀唔畀擔保？咁既案，好喇一千蚊保釋喇，於是書記立即凖備拘捕令畀大人簽，然後叫環頭Warrant PC嚟攞，即刻去立法會拉長毛。咪住，咁單案開唔開審？長毛條友喺立法會拉布，肯定唔會走佬，點會拉唔到，好喇件案stand down一陣，拉到佢即審。咁呀！拉到就back with no bail，如果唔喺畀咗擔保佢，佢分分鐘又唔嚟。Warrant PC帶住張拘捕令去立法會，走到長毛嗰度，長毛，你收皮，我剪你布，execute張warrant。長毛話咪住，師兄，你唔拉得我。點解唔得？師兄，你知唔知立法會權力及特權條例第5條講乜？唔知喎。咁你聽住：

章： 382 標題： 《立法會(權力及特權)條例》 憲報編號： 71 of 2000
條： 5 條文標題： 免遭逮捕 版本日期： 01/07/1997
附註：

具追溯力的適應化修訂─見2000年第71號第3條

任何議員─

(a) 在前往立法會或任何委員會會議途中，在出席會議或會議後回程中，可免因民事債項(如訂約承擔則構成刑事罪行的債項除外)而遭逮捕；
(b) 在出席立法會或任何委員會會議時，可免因刑事罪行而遭逮捕。

吓！咁咪唔拉得你，好，我一於等到你散會。師兄，你唔知乜叫拉布咩？咁我等你囉。有排等嗰喎。咁我等到你拉柴囉。

喺法庭嗰邊，得個等字點算好？主控向大人建議唔等長毛，開住波先，拉到佢播番個錄音畀佢聽，然後畀佢重召證人嚟盤問囉。

呢啲就叫法治喇，有啲人可以治，有的人無法治，因為好多窿窿罅罅，畀人走吓的法律罅。又咁啱喎，立法會權力及特權條例係382章，你知隔離嗰章係乜呀？383章咪係香港人權法案條例囉，幾就手，用埋佢嚟玩囉。

咁點解長毛啲law咁醒？一來上得庭多，上到終審法院都唔使律師代表佢，二來舊年佢比馬大狀串咗一鑊，於是就喺咁依睇兩眼例書囉。你問下馬大狀喺終審法院講過嘢未？唔係喺厠所同人傾計嗰種喎，喺對大老爺陳辭嗰種喎，唔係喺門口撞到大老爺講早晨嗰啲喎。我肯定佢未上過。