打釘後記

近日城中給那兩位體態豐腴的「金童肉女」弄得烏煙瘴氣, 一時之間, 香港人又熱烘烘的啓動邏輯思維、偵探頭腦, 一起搜尋真相來。陳校長前些時聲淚俱下, 一臉含寃受屈之相, 戲碼交足, 越演越烈, 當自己是病貓, 一於搬出「病」這招牌來避險, 搞到教育局束手無策。人家拿手好戲嘛, 演完影子學生, 現在就演影子校長, 老校失了踪影, 教育局吹鬚睩眼。不過, 無有怕, 副局長是紅色娘子軍, 對付這婆娘, 綽綽有餘。個名就好應景, 這婆娘個名有個「章」字, 生了病就是個「瘴」字, 一塌糊塗, 睇佢點收科。好簡單, 刑事調查這弄虛作假的影子兵團事件, 到其時根據《教育條例》, 話你unfit to be a teacher, 咁咪可以butcher 咗佢囉。當然, 按程序來幹, 夜長夢亦多, 郁下分分鐘又搞司法覆核, 啲law 友又有生意了。

這邊廂肥仔健的真相越辯越黑, 開始要轉移視綫了, 指責警方怎樣的不公。天「眼」恢恢, 偏偏睇唔到拐「子」佬, 咁可以點講呢? 咁橋, 個名有個「子」字, 運交華蓋, 命途當拐。我在想, 若果我給拐子佬拐了去, 打埋釘, 但執番條命仔, 坐上的士, 我唔報警, 我起碼都打個電話畀老伴, 報過平安, 以免牽掛。不過咁, 可能肥仔健好細心, 嗰個鐘數老婆可能瞓到打晒鼻鼾, 唔忍心叫醒佢, 正如佢體諒啲警察一樣, 唔想叫醒晒佢哋。

這件案怎樣收科? 好簡單啫, 當事人話要閉嘴, 要遠離政治, 要遠走他方, 要盡快完結, 咁咪去同OC Case講, 我唔再追究喇, 個OC Case篤落個file度, 3粒英文字母: NFA, 搞掂。