黑金買票的遐想

話說廉署介入調查黑金買票事件，於是請了長毛去總部會面。正是虛構的黑金買票，自然用虛無的方法查，結果也虛幻。

我就虛擬了這會面過程。

調查員：梁生，今次請你嚟協助調查你聲稱嘅買票案，首先好多謝你合作。

梁議員：合咩作啫，老作得唔得先，犯法呀？有無煙仔呀？好眼瞓喎，乜都唔記得晒。

調查員：梁生，辦公室唔食得煙喎，唔好意思，唔好意思。不如飲咖啡好唔好？

梁議員：好喇，你哋啲咖啡都出晒名，一於整杯嚟。

調查員：梁生，我哋今次請你返嚟希望你能夠協助調查買票案。

梁議員：閘住。我無報案喎，嗰啲嘢對住啲市民講下唔犯法喎，搞政治講乜都得喇，搞政治邊有唔講大話架。你氹我報案，想屈我虛報呀？

調查員：梁生，乜除咗講一億之外，其他都係老作架？

梁議員：我有權唔答你喎，我又唔係嚟報案，我唔鍾意講你知得唔得先？你哋無啦啦開乜file啫？要報案我兩三個月前就報咗喇，你哋醒啲好唔好！

調查員：梁生，你幫下忙喇，你都要畀啲料我向上頭交代架。老老實實，究竟有冇中間人先？

梁議員：你哋咪屈我，我幾時講過無中間人？

調查員：咁你可唔可以形容下佢個年齡、身材、樣貌？

梁議員：好喇，等你可以交差。條友睇起嚟三十至五十歲，中等身材，普通様貌，頭髮唔長唔短，身高超過5尺，戴太陽眼鏡，講説話有啲口音。個樣睇嚟就係中國人，不過國藉就唔肯定，你知喇依家好多人都話自己唔係中國人，Michael Jackson都當自己唔係黑人喇。

調查員：梁生，你咁講，起碼三幾億咁既樣既人喎。你哋點聯絡架？

梁議員：我唔識佢架，我果日企係路邊食煙，佢行埋嚟踎係我側邊，佢話：長貓，你踎低大家講兩句。我望下週圍都無其他人，先至知道佢同我講。我於是踎低同佢傾兩句囉。我問佢係邊位，佢話你唔使問咁多，佢話今日有緣，問我張票值幾錢，佢老細想幫我買，包我兩世無憂。我話你咪玩喇，阿哥，你老細邊位。佢話你唔識規矩既咩，呢啲嘢邊有人問架，總之傾條件唔傾人事。我話犯法喎，我唔會咁做。佢話你長貓入去踎都踎過幾次，上庭多過律師，犯法你未驚過喎。

調查員：梁生，你唔好遊花園，你同佢點聯絡？佢有無講叫乜名？有無留電話、電郵？

梁議員：都唔記得佢叫Mao, Maro定係Mario，總之就係麻甩佬。佢話佢會再揾我喎，聯絡嘅暗號係“支那豬”。

調查員：咁佢有無再揾你？

梁議員：無喎。再見番佢我都未必認得喎，個個都咁上下樣。老老實實，我知嘅都講晒喇，我無乜時間架，都好詳盡喇。話時話，我哋正話茶聚咋，我唔係舉報，我講啲嘢唔構成提供虛假資料，仲有，我當果個人講笑咋，我都無懷疑過佢想賄賂我。

調查員：梁生，你又講到似曾曾咁？

梁議員：亞Sir，呢啲政治把戲你見得少咩？順口嗡都好平常啫。啲人有腦都諗到，就算畀埋我果票，結果都一様，有無咁蠢駛啲咁嘅錢？

一件看似大案，廉署逼不得已主動調查，終於查無實據，不了了之。長毛講述事發經過，似是而非，這中間人買票事件，隨著政改在立法會不獲通過，便成為一個一億元的笑話。一時之間，動不動都講一億來收買人心了。