畢屈糸列之六：囤地務農

話說香港潮流興起務農，歸田園居，畢太有個親戚在政府決策機構做事，對於政府發展土地方針瞭如指掌，就是這親戚，鼓勵畢太去買農地，美其名為務農養魚，其實暗渡陳倉，乘機撈一筆。這親戚都算親了，精確點講是畢太的哥哥。有血緣就是親戚嘛，兒子老子含糊地講也是親戚，就像老外叫honey，老公老婆男女朋友，甚至較親密的朋友，都可以甜甜蜜蜜，honey一番，跟近年香港人用親戚這詞，有異曲同工之妙。

畢太這個哥是測量師，他高瞻遠矚，選擇打政府工而不作私人執業，原因就是可以洞悉先機，他知道大部份政府工只是鐵飯碗一個，只扒碗裏的飯當然就只是會是隻會生銹的碗，但有句話叫吃裏扒外，那碗就變成八寳盆了。屈生做了20年公務員，已爬到決策級别的職位，可以利用職權，影響自己利益。所謂影響利益，講得白一點就叫以權謀私，把利益輸送給自己，如果送給別人，當然就有交換條件了。

「阿哥，叫我買農地玩耕田，我不如去街市買菜，咁辛苦，耕乜嘢田啫？真喺要玩啲咁嘢，不如去參加嗰啲有機耕種、綠田園好過。你叫我夾份一人九百萬去做農夫，你喺咪黐咗線？」

「阿妹，你估我真係儍嘅咩。你同人講梗係鍾意耕田，唔通話我鍾意囤地咩。我等咗幾年先至有機會撈一筆，你話啦市區地我邊買得起啫，嗰啲係地產商先至有資格玩，農地平喎，政府發展要收地到時咪賺快錢。」

「阿哥，唔怕畀人拉insider trading咩？」

「金融投資，股票買賣先會因為內幕交易犯法啫。我做嘢得到啲資料，先做投資，佢無證無據喎，告我身為公職人員行為不當都唔得喇。政府發展新界東北，十幾年前都開始研究，我又話唔到事。我買噠地又會報上去，一早同老細單聲，佢話無問題，申請乜都OK喎，揸正嚟做，批唔批任佢講。」

「阿哥，乜你喺決策過程唔使避席咩？」

「梗要喇，做戲咁做啫。朝見口晚見面，除非瞓直，否則避席人哋一様畀面，最緊要阿頭OK。我同佢講，揸正嚟做得架喇，我同啲手下都係咁講，叫佢哋唔使畀面。唔使畀面即係畀面囉！」

「咁佢哋真係揸正嚟做咁點呀？」

「阿妹，你真係未打過政府工！老細好易氹，只要奉承下，唔惹麻煩，就好易話為，手下你寫appraisal，佢敢唔聽話？真係唔聽話，咪調走佢，唔使督眼督鼻囉，所以你話有乜阻滯？」

就是這樣，屈氏兄妹就合資買了一大塊農地，有時帶著草帽，除下野草，影幾張相放上facebook與人分享。萬一給人抖了出來，利潤幾千萬，再做兩世公務員也賺不到，大不了就辭工務農，假戲真做。再萬一被控身為公職人員行為不當定罪，那幾千萬已袋袋平安。畢屈太更加平安，她既非公職人員，也無協助教唆，她那份錢穩袋了，奈她不何！

無獨有偶，地政總署助理署長林嘉芬和她老公剛好像屈氏兄妹那樣，手法如出一轍，如有雷同，實在是貪的心靈相通。更豈有此理的是這助理署長和老公一起開測量公司，吃裏扒外，吃著碗裏看著鍋裏。如此類推，政府律師跟人一起開律師樓，政府醫生就開醫務所，低級公務員就去抬去托，小販管理隊去合資做無牌小販，起碼可以通風報訊，漁農自然護理署的就只好開鷄竇了。